** قصص قصيرة **

[بدويه وكلي فخر]

قررت أكتب لكم كل شوي قصصي القصيره بعضها انا بطلتها وبعضها أبطال في حياة بدوية .... وممكن مؤلفات بدوية ومقتبساتها من قصص اخرى ....

لنطرد الملل من حياتنا وعقولنا ومنتدانا .. والحين نبدأ ...

( المضايقات في العمل )

بدأ صباح يوم عمل جديد وبدوية كل يوم تفكر بالإستقاله ....
بدويه : الله ... الله ... تصدق طعم الحليب كشخه ...
زوجها : الحمد لله والشكر لك يارب !!! يعني ماينفع تقولين الحليب طعمه لذيذ !!!
بدويه : الحليب اوكي لذيذ . بس لم يكون في الحليب زنجبيل وهيل ودارسين وشاي !!! هنيه أقول الحليب كشخه . ههههههههه عرفت !

بوست عيالي بفرشهم وانا اشعر ان ودي انقلهم بسريري واسحبها نومه وطقاق يطق الشغل وبسرعه بسرعه اطلع من البيت وبراسي صداع ...اليوم الدوام غير عن باقي الأيام !!!!

امشي بسيارتي وبالي مشغول وأقول بيني وبين نفسي : اليوم لازم تنحط النقط على الحروف ونحل مشاكل العمل ونعرف الأسباب اللي تخلي كل موظفه بعد شهر تستقيل
والمحامي الخاص للعمل يبيني احقق بالموضوع وانا مافيه ولا وحده أثق فيها ومركزي يخلي كل وحده تخاف مني وبنفس الوقت تبي رضاي بس يخافون أكثر من اللي فوقي !!!
واللي فوقي ماتقدر مالها صلاحيات مطلقه وأي خطوه تتخذها لازم تعلمني عشان الموافقه لازم تمر مكتبي !!! ياربي الصداع هاللي فيني يامن الحليب يامن الخوف خلاص قربنا من حل المشكله يالله يابدويه انت دايما جريئه وموخوافه اش فيك اليوم ..!!!

وصلت والبواب الجاسوس على بدويه يهلي ويرحب ..
طيب يالبواب اول المحققين معاهم بإذن الله ..

مر وقت لابأس به انتهيت به من أن المسؤوله عن قطع رزق الموظفات هي اللي فوقي مباشره وعندما سألت عن السبب وقمت بالإتصال على كل من تركت العمل قالوا لي عجبا !!
أخذت أفكر كيف بإنسانه كبيرة في السن وموظفه مخضرمه تقدم على هذا الشيء أين المنطق ... معقوله الحرب التي كانت بين فلسطين والأردن ونفي الفلسطينيين من الأراض الأردنيه وراء هذا الخلل ... معقول ...

لممت كل المعلومات وتوجهت الى مكتبها وقلت تنحل القضيه بالود والإعتراف وتكافئ على خدماتها وتنثبر في البيت ويغلق الموضوع .... لكن !! كيف تكتسب الثقه في طرد الموظفات بطريقة خفية من ممكن يكون ظهرها التي تشد ثقتها به ... جنسيتها غير خليجية حتى تكون لها الصلاحيه !!!!!
توجهت عندها وبينت لها كل شيء وانا بصراحه أحس قلبي طلع من مكانه وتوزع بجسمي !!
ما تعودت هذا الحديث وان احط بمثل هذا الموقف ...
لم تكن بالإنسانه السهله !! لأنها مجرمه ...

احتد النقاش وتوالى الإنكار فقمت ....

بدويه : سأعطيك وقت حتى تقتنعين بأن ما قمت به غلط لايرضى الله ولارسوله ولا المسلمين
ولعبة القط والفأر التي تمارسينها مع الموظفات أصبحت مكشوفه ....
وصلت عند الباب وعندما فتحته ظربت بيديها الثنتين وبصوت عالي تقصد به زعزتي وتخويفي
وتسميع الموظفات !!!
الغوله : بدويه أعلى مافي خيلك أركبيه .....( الوجه شوي وينفجر )

ولاشعوري ارتسم على وجهي ابتسامة ساخره وبنفس الوقت بكبرياء !

بدويه : طبعا أنا أعلى مافي خيلي أركبه .... وانتي أعلى مافي حميرك أركبيه ....


وتنتهي قصة هذه الإنسانه بأن عاقبها ربي وطردت من العمل ولا أعلم ماذا حصل لها بعد ذلك ....

وقمت أنا بترك هذاك العمل وتغيير مجراه كليا واخترت فريقا من الرجال الأكفاء ينفذون خيال وتصاميم بدويه ....

أصبحت بعد ذلك اليوم اخصص ايام من العطله لأنام بين أولادي بغرفة التلفزيون بعد سهرة خاصة على أفلام دزني ... أصبح للحياة مفهوم آخر يزينها أولا عبادة الله والخوف منه سبحانه ...ثم زوجي وأبنائي وكل قريب من بدويه وصديق ....

( المرأة تحب الحياة الأسريه بفطرتها )

الى اللقاء قريبا بأحد قصصي ....

بدويه وكلى .......

[بدويه وكلي فخر]

( هدية بدوي ..... )

ترقى ولد عمي زوج بنت عمي وأخذ زوجها منصب كبير في وزارة ..... وطبعا الكل حب يهديه الهديه اللي يحس انه مناسبه ....

وقام واحد من عربنا البدو الله يغنيه ويكثر خيره وراح بنفسه يقدم هديته بنفسه !

دق الباب والخدامه تقول منو ؟! والرجال يقول : روحي نادي ماما يالله بسرعه !
وتجي بنت عمي وتسأل نعم من عند الباب ؟
يسلم ولد الحلال ويبارك ويقول : وسعوا الباب وبدخل الهديه وحق ابوكم أكثر .
تفتح الباب بنت عمي وهي راده وراه ويدخل الرجال خروف !! وما وعت بنت عمي الا الخدامه مقلعه داخل الفلا والخروف طربق طربق طربق مرووح آخر الحوش وتنصدم بنت عمي !!
وتسكر الباب وتقول : اش هالوهقه وين قاعدين ؟ شخباري ؟؟؟ ياربي شسوي ؟!
( والخروف ياحلوه لبى قلبه قاعد يكمل جولته بالحوش وسط مكانه الجديد ويطربق وخايف بنفس الوقت ويصقع بالطوف )
وبنت عمي تنادي خدامتها: سيلا جيبي حبل وتعالي , ويطلعون عيالها اللي أكبرهم بنت أم 10 سنوات وتطير بوهتهم بهالكائن الغريب .
وبنت عمي وعيالها صوتهم واصل للفريج الثاني هي وعيالها يركضون ورى الخروف وكل ما ج بطريقهم انحاشوا وهم يصارخون , وبعد الكر والفر قدروا يمسكون الخروف .
قالت بنتها : يمه لابس كعب !! ماتنلام بنيتنا وين نشوف خرفان هالأيام .
ويركض ولدها للمطبخ ويقوم الخبل المطفوق يصب بيده حليب ويركض وشوفو التقطر على الأرض !! حضرته يبي يشرب الخروف حليب !!
وتقوم أمه تهاوشه ويرجع للمطبخ ويصير ذكي هالمره حط الحليب بطاسه !! ( يادافع البلا ) وبس يقرب الحليب للخروف وقوم بكراعه وطننننن ! الا سبحان الله الطاسه تحلف بنت عمي انها بوجه ولدها !!
وأرد عليها ساخره : اش عليكم خروف هداف وصويب بعد دخلوه دوري الخرفان .>>>ههههه
وتقوم بنتها الأصغر وتقول يمه نبي نجيب له شامبو بيبي جونسون نسبحه ونمشط شعره اهو وصخ وشعره كشه !!
وبالعزر تقوم بنت عمي وتربطه بحبل في مواصير بارزه بطوفة الملحق بالحوش !!
وبعد معركه الكر والفرمابقت تنتهي تروح ترد على تلفون البيت الا هذا رجلها يضحك .
اش فيكم اتصل فيني راعي الهديه ويقول لي انت من بدوي ؟ قلت : إلا .. وحرمتك ماهي بدويه ؟
قلت : إلا . قال أجل تراني دخلت عليهم خروف هدية منصبك الجديد بس تراني شكلي وهقتهم يوم دخلت الخروف الا أسمع صياحهم وركظهم هم والخروف ! المهم روح شوف أهلك شكلهم مو عارفين له !!!
بنت عمي : ماقصر خلاص ماله داعي شوفني رابطته بالعامود اللي على طوفة الملحق وما بيه يجي الليل الا بالثلاجه وبداوينك هذول الي يبي يجيب خروف يجيبه مقطع وجاهز بالكرتون !!!
ويمر كم يوم الا جعله يحي ولد عمي يشقلهم كلهم للجواخير في جولة تثقيفيه لعياله !! ويدقق على التحفه بنته : شوفي ياماما هذي رجل الخروف ثابته فيه واسمها كراعين مو كعب !! وانت حبيبي الخروف يشرب ماي موحليب وياكل أعشاب اسمها جت ! وأشطركم حبيبتي النظيفه اللي تبي تسبح الخروف !
ونظحك كلنا عليهم وأقول الله يابنت عمي انتي والتحف عيالك ذكرتوني فيما مضى احنا وين !! شي !! كان ابوي الله يرحمه عنده جواخير غنم وكانت أي شاة لم تولد الرعايه المنزليه لها عندنا في بيتنا وعاد هذي لها امتيازات خاصه لازم تتنفس عندنا والا الطلي اللي تجيبه وااااااااو يجنن أذكر واحد منهم سميناه ربيعه وماأذكر في غيره بس كان كلا يناقز وينطط ولازم كل شوي نسوي له رظعة حليب وأذكر لما كنت أرظعه يخلص بسرعه وكنت خايفه حيل لأنه بس يخلص من حليبته يرقص بريك دانس !! المهم تطورنا في حبنا لربيعه وتقوم أختي اللي أكبر مني بخمس سنين وتاخذ أحد فساتيني وقتا يمكن عمري 7أو8سنوات وأذكر فستاني كان وردي ومكشكش المهم قامت ولبست ربيعه فستاني وتحط على راسه شباصه وكان الطلي ربيعه أسود لامع وجميل وشعره كيرلي ونقوم كلنا أنا وخواتي واخوي وبكل ثقة ندخل الطلي بالنيولوك على ابوي الله يرحمه بالديوانيه وعنده رجاجيل وندخل الواد ربيعة ونروح بعيد تحت الدريشه نسمع وقع المفاجأة لابوي وضيوفه ومانسمع الا صوت قربعة المواعين وتصفق البيالات ببعض والرجاجيل ينادون بعض جوده جوده واللي يضحك واللي متعجب وعاد ابوي الله يرحمه وده .... يفرمنا ....

سقى الله ذيك الأيام . أيام البراءه وتربية الخرفان في حوش البيت !!!!


































( سبحانك اللهم وبحمدك أشهد أن لااله الا انت أستغفرك وأتوب اليك )

[هتون]

بدويه سوالفج عجيبه ,,,, واسلوبج القصصي ما ينمل ....اتحفينا بقصصج وهل من مزيد ...؟

[*قوت القلوب*]

بدوية
كملي بس وش سوى ابوك الله يغفرله ويرحمه بس عقب ماراحو الرجال!!!!!!!!!!!
اسلوب ساخر ممتع في انتظارمغامراتك






كنوز منسية
قال ابن القيم :" من ادمن قول ياحي ياقيوم كتبت له حياة القلب"

[بدويه وكلي فخر]

( عمتي والخطيب )

قوت القلوب .... ماأذكر بس ابوي الله يرحمه يعصب ويهاوش وبعدين خلاص جعله في الجنة ..... واليوم بعطيك من قصصنا ومواقفنا مع ابوي ....

في عصاري الكويت الجميلة حبت عمتي الله يطول في عمرها زيارتنا ذاك اليوم اللي
فيه مباراة بين فريقي الكويت والإمارات أيام عز الكورة الكويتيه !!!! فما لقت ذاك اليوم أحلى
من بيت أخوها ( ابوي ) ولاأحلى من فريق المشجعات بناته ( احنا وين والكورة وين )
وقتها كان عندنا رجاجيل يخطبون وحده من خواتي الكبار وابوي لاهي في استقبالهم واخوي مشتط بين الديوانيه وبينا يتابع المباراة .....
وطبعا القراده تدور أهلها !!! أنا ياغافلين توني قاعده من النوم وفرحانه بجيت عمتي وعاد وسعي خيالك وادخلي معاي بالجو ....

دخلت الصالة وامي وخواتي وعمتي الغاليه وهذا صوت خالد الحربان مغطي ( معلق كورة قدم كويتي )على صجتهم ولجتهم وبوستين على خدود عمتي وعينها طايره وراي بالشاشه
خايفة لايفوتها قول ....
وامي جعلها في الجنه كني فيها مستانسه بجية عمتي فوق الحميميه اللي بينهم بس بالمقابل
جت بوقتها لأن امي كل ماجانا خطيب تتوتر وتخاف وتصلي وتدعي ويزيد معدل الكهرباء في
البيت !! ترى احنا بالكويت ندفع فاتورتين حق الكهرباء !! شي حق لمباتنا وشي حق حرق أعصابنا !! >>>>>> هههههههه أمزح .
وكان عمري وقتها 14 سنه ومستحيل بذاك العمر تشدني كورة ولازلت بعيده , وماشاء الله عليهم جعله بالعافيه خلص شي اسمه قهوه وشاي .... دخلت المطبخ وسويت شاي وحطيت الحب وابسط بين خواتي وبخاطري يعني أشارك بتشجيع المنتخب !!!
ويحتد اللعب بين الفريقين ومعروفه عمتي جعلها تحيى غرام بالكوره لايوصف وكل شوي
تتحمس من مكانها وتنط يالله قول !! وخيبون ظنها اللا عبين وانا أقول ( الله يهديهم مايدرون ان
عمتي متولعه بالكوره ؟ العبوا زين طيبوا خاطرها ... )
وانا توني اشرب بأول استكانة شاي وأزأز لب وطبعا دريشة الصاله كبيرة وكلها مفتوحه
وتطل على حوش وممر يؤدي الى مجلس الرجاجيل !!!!
وتحط الكويت بمرمى الإمارات قول ويصير شي ؟؟؟؟
صرخت عمتي العجوز اللي تمشي تتمخطر يمين يسار ! صرخه بفرحة لم أسمع حتى الآن
بمثلها ... فرحانه ويالله خواتي ماقصروا وأنا ياألبي ياأنا اكتفيت بالفرحه فقط وشرب الشاي
وأزأزت اللب ....

ويقومون خواتي المتحمسات ببوسة وظمة عمتي ... وآخر انشكاح !!
ويجينا اخوي من الديوانيه طاير من الفرحه طاير ... ها جبنا قول ؟؟؟
ويدخل وراه ابوي والله ياهي من دخله !! ( انا أكتب لكم وغشيانه من الضحك الكتابة قريبه
من الحقيقة وتأتي بالحقيقة ولكن تفتقد لطعم ورائحة الحدث )

دخل ابوي الصاله بسرعة معصب ويهاوش ( وجع والله وجع ياللي ماتستحون ) ويتطشرون خواتي وينحاشون وأنا بكل ثقة لأني ماسويت شي مكمله قعدتي وشرب الشاي !!!!
الا تجيني شوته من ابوي (جعله ياربي يمشي فيها بالفردوس الأعلى )
وأنصدم وأخترع ويكمل دربه ابوي ....يهاوش
منهي اللي ماتستحي فيكم صوتها واصلني عند الرجاجيل ؟ فشلتونا الله يفشلكم ؟؟
الا خواتي فريق التشجيع حق عمتي اللي كله ولاء لها !!!
يبه والله عمتي اللي صرخت .. ويصير وجه عمتي الوان منحرجه يابعد عيني وتضحك من الموقف والشوته اللي جتني !!

ويسكت ابوي اهنيه عاد مايقدر يقول شي عشان اخته عاد هاذي الغالية وفي بيته !
مايخالف بابا مقدره موقفك ... ويقول بكل هدوء بعد ما هدأة العاصفة ( لايجيني صوتكم )
ونكمل الجلسة بتشجيع فريق المنتخب واكمل الشاي والحب وانا موراضيه وأهاوش ياسلام انا اللي مالي دخل بالكورة ولا أشجع ولالي صوت أنطق وانتوا مايجيكم شي ؟؟
والله ظلم ؟؟
الا اختي اللي جاين لها الخطاطيب المكاره تقول : مايخالف لازم انتي تصيرين كبش الفداء مالي يعني يرضيك الشوته اللي جتك تجيني يوم خطبتي ؟
وارد عليها : لأ .. بس موحرام انطق وانا بريئة وما لي ذنب ؟ وما جيت الا نص المباراة اللي
أساسا ما تهمني ؟؟
وعمتي المسكيته يوم ج القول الثاني

[بدويه وكلي فخر]

نعتذر لمشاهدينا الكرام عن الخلل الفني ونكمل ماتبقى من فيلم .

( عمتي والخطيب )

ولم اختي اللي الخطاب جايين علشانها أنبها ظميرها قالت : خلاص بدويه والله رحمتج
خلاص اذا طلع الخطيب اللي جاي سنع ووافق عليه ابوي وانا وافقت عليه ... اذا جاني المهر بعطيك أتعاب الطقه !! أقصد الشوته ! زين .
وأرد عليها وانا معصبه :
والله ماشاء الله عليج خوش تفاوض وخوش شماته يارب الخطيب ياخذك ويشوتك زين ؟؟
والف وجهي منها وانا أفكر اشلون ينرد لي اعتباري ؟؟
ويجي القول الثاني وعمتي ياحرام فرحانه مثل الطرمان !! ام ام ااااه وتعض فستانها بصرخة
مكتومه !! مايسوى عليج ياعمتي ؟؟ كان قعدتي في بيتك ورقصتي وصارختي واحنا اللي نجيك !!
وتخلص المباراة ويأذن المغرب ويمشون الخطاب ونجلس شوي وننتظر ابوي يجي من المسيد واختي على أعصابها .... وبس دخل ابوي ... الا عمتي على طول : ها ؟ بشر ؟
الا ابوي يقول : شحليلهم أجاوييد والولد توه متخرج وله شهر مداوم قلت لهم
عطونا وقت نشوف راي البنت ونسأل عن الولد .
اختي عاد موجالسه معانا !! عشتوا مستحيه وبنفس الوقت معتمده علي أوصل لها الأخبار!
ومن هنا ومن خلال هذا الموقف بدأت السيدة بدويه رحلتها مع المغالب ....
جيتها بكل هدوء ومبين علي الحزن وبكل مكر !!
ابوي يقول اللي جاي طلع مو جاي علشانك !! ( وتنط عيونها من مكانه وتبولع ريجها )
طلع واحد جاي يخطب وحده ويبي ابوي يتوسط له عند أهل المره عشان يوافقون عليه !!
هنيه صراحة خفت عليها من السكته القلبيه بس قلت تستاااااااهل .
والحين انا شاتني ابوي بسبب خطبة وحده ماأعرفها !!انا صرت كبش فداء لوحده ماتهمني.
وأقعد لعب بأعصابها وتحريك بظميرها !! لين قالت بعد مارد لها الأوكسجين :
يالله كلن ياخذ نصيبه , خلاص بقول لأبوي انك توج قاعده وانش مالج ذنب وانج بريئه
( وتقلبها لغة فصحى ) براءة الذئب من دم يوسف ..
وتروح الصاله على طول ... وبس طلت عليهم الا عمتي تيبب لها وتقول مبروك ..
وانا وراها اشوف ردت فعلها !! وتلتفت علي منفصه عيونها وفاتحه فمها !!
وابوي يسكت عمتي : مو ألحين يا أختي ؟
واختي ودها الأرض تنشق وتبلعها مستحية ماتوقعت وبالأصح مشى عليهاالمغلب !!

النهايه

























( اتقي شر الحليم اذا غضب )

[بدويه وكلي فخر]

تكملة ماتبقى من روائع القصص البدويه

( عمتي وكأس الخليج )

بعد مرور السنين على حادثة عمتي والخطيب ....

الكورة الكويتية بين مد وجزر في تثبيت موقعها على مستوى الخليج والعالم .....

وعمتي جعل عمرها طويل لازالت مخلصة لفريق المنتخب الكويتي !! وكل مباراة نضطر
نتابعها عشان عمتي ! واذا خسر الفريق نزعل عشان عمتي !!
أدري تستغربون !! وتتساألون ؟؟ بس أنا عرفت السبب ...
لأن اخوانها مايتابعون الكورة ولا يشجعونها عاد هي تنوب عنهم والله أعلم ؟؟

وحصل مره ان سافرنا ( فريق التشجيع الخاص لعمتي ) وجت مباراة المنتخب مع فريق
دولة أجنبية ونضطر نكلمها بالتلفون ( فوق مخاسير السفر مخاسير مكالمات مالها داعي )
وها عمتي بشري فاز المنتخب ؟ وتقول عمتي بكل عصبية : مالت عليهم كلوا تبن وماجابوا
ولا وصلوا حتى يم العارضه !!!
ماشاء الله عليك بناديها عمي مو عمتي !!
طيب خلاص عمتي وسعي صدرك الله يخلف عليهم المره الجايه , لايرتفع الضغط !!
وتقوم عمتي الله يطول عمرها وتحط الحره فينا !!
عمتي : وانتوا متى بتجون الحين ؟ انتوا وابوكم ؟ ماشبعتوا ؟ محد يونس هالأيام بالكويت
من رحتوا وانا ظايج صدري وكملوها هالشواذي يوم ماحطوا قول ! يالله لاتطولون .
طيب عمتي خلاص مع السلامه ....

وتمر تقريبا سنه ويفوز المنتخب الكويتي بكأس الخليج وشوفوا الأحداث !!!
فرحت عمتي فرح لايوصف بكأس الخليج ..
وتثقل كفة فرحة عمتي على الكويتيين
ونعمل لها مفاجأة لم تطري على بالها !!!
كان أحد لاعبين المنتخب جار لبيت عمي , فطلبنا منه ليلة يسير فيها كاس الخليج
على بيت عمتي عشان تلمسه بيدينها وتحظنه وتلمه وتبوسه بعد !! بس يبرد خاطرها !!

ويجي الكاس في بيت عمتي ويصير بحظن عمتي الغاليه ونصورها مع الكاس !!
وتبوس فيه وتبكي مومصدقه وتعشينا ذاك اليوم كلنا بوفيه فيه ذاك المفطح ونتعشى
وتقول عمتي : الله يجعل الكاس مايتعدى حده ان طلع للسعوديه عند عيال عمنا ويرجع لنا.

بس حسافه الله يهديهم لو انهم مخليني انا اللي مكلمه اللاعب !! كان قلت له ممكن بعد ميداليتك تصور معاها عمتي وممكن تقوم انت والفريق تسيرون على عمتي وتجلسون
جلستكم المعروفه وعمتي وسطكم عشان نصوركم معاها ؟!!!

ولازالت عمتي تتابع أخبار المنتخب وتتابع مبارياته حتى اذا مرضت تتابع المباراة

ويامنتخب الكويت حرام عليك عذبت عمتي بخساراتك الكثيرة ارحم حال محبيك ...


لازال اللعب مستمر .... وهايدوا اوو هايدوا ....












ولازالت بدويه ترحم عشاق الكرة من ......

[بدوي]

الحين يابدويه كذا القصص القصيره..:doh[1]:

صدق اللي جاب سالفة قريب بدو

ومع هذا الا ان الاسلوب يجبرني اكمل القراءه

[بدويه وكلي فخر]

صدقني بدوي .... روائع قصص بدويه ووسع صدرك :poster_dev[1]: ....

وإنتقادات بدويه حرة صريحة .... أرحم من الدخول بالمهاترات ومجاملات مالها داعي !

ودرت بالمنتدى ولقيت نفسي بأروقة تشع فأحببت الجلوس عندها .

وقريب بدو .... أحسن من مواعيد عرقوب !!!:poster_dots[1]:

[حنييييين الشوق]

في انتظااار البقيه